Azərbaycan Prezidenti İlham Əliyev İrəvanda keçirilən Avropa Siyasi Birliyinin 8-ci Sammitinə videokonfransla qatılaraq Qərb liderlərinə güclü mesajlar ünvanladı. O, Zəngəzur dəhlizinin türk dünyası üçün əhəmiyyətini vurğuladı.
"Haber Global" YouTube kanalının hazırladığı videosüjetdə bildirilir ki, Prezident İlham Əliyev Azərbaycanın Avropa Parlamenti ilə bütün əlaqələrini dayandırma qərarını xatırladıb. Bu qərar, Azərbaycana qarşı qəbul edilən qərəzli qərarlara cavab olaraq verilib.
"Azərbaycanla bağlı yalanlarla dolu qərarlar qəbul etdilər. Bu ikili standartlar qəbuledilməzdir. Azərbaycanın ərazi bütövlüyü hər hansı digər dövlətin ərazi bütövlüyü qədər dəyərlidir", - deyə videomaterialda İlham Əliyevin sözlərindən sitat gətirilir.
Prezident, həmçinin Azərbaycan-Ermənistan sülh prosesində mühüm irəliləyişlərin olduğunu qeyd edib. O, Avropa Komissiyasının dəstəyini təqdir edərək, digər Avropa qurumlarının, xüsusən Avropa Parlamenti və Avropa Şurası Parlament Assambleyasının sülh prosesini sabotaj etməyə çalışdığını bildirib.
İlham Əliyev 2025-ci ildə Vaşinqtonda keçirilən tarixi sammitə də toxunub. O, Ermənistanla sülh sazişinin paraflanmasından sonra Azərbaycanın 1990-cı illərdən bəri tətbiq etdiyi bütün tranzit məhdudiyyətlərini təktərəfli olaraq ləğv etdiyini xatırladıb. İlk dəfə olaraq Ermənistana neft məhsulları, benzin və dizel yanacağı tədarükünə başlanıb.
Zəngəzur dəhlizi məsələsinə toxunan Prezident bildirib: "Sülh bizim və Ermənistandakı tərəfdaşlarımız üçün artıq reallığa çevrilib. Sülhün digər mühüm nailiyyəti kommunikasiyadır. Həm Azərbaycan, həm də Ermənistan sülhün praktik faydalarını indidən görürlər".
Daha ətraflı videosüjetdə: Zəngəzur dəhlizi, İlham Əliyev, Avropa Siyasi Birliyi
