Azərbaycan Prezidenti İlham Əliyev iyunun 1-də ABŞ Dövlət katibinin iqtisadiyyat, enerji və biznes məsələləri üzrə köməkçisi Kaleb Orrun başçılıq etdiyi nümayəndə heyətini qəbul edib.
Görüşdə Prezident Əliyev Kaleb Orra “Bakı Enerji Həftəsi” çərçivəsində keçirilən sərgi və forumun rəsmi açılışında iştirakına görə təşəkkür edib. ABŞ Prezidenti Donald Trampın tədbirə məktub ünvanlamasını məmnunluqla qarşılayan dövlət başçısı bu tərəfdaşlığı yüksək qiymətləndirib.
Son dövrlərdə ikitərəfli münasibətlərin uğurla inkişaf etdiyi vurğulanıb. Strateji Tərəfdaşlıq Xartiyası və işçi qruplarının yaradılması ilə əməkdaşlığın genişləndiyi bildirilib. Azərbaycan-ABŞ İqtisadi Dialoqunun ilk iclasının keçiriləcəyi qeyd edilib.
Kaleb Orr ABŞ Prezidenti və Dövlət katibinin salamlarını çatdırıb. Qonaq Donald Trampın məktubunun tədbirin əhəmiyyətini göstərdiyini vurğulayıb.
Görüşdə qarşılıqlı maraq doğuran məsələlər müzakirə olunub.
