İyunun 26-da Heydər Əliyev Fondunun vitse-prezidenti Leyla Əliyeva və Bakı Media Mərkəzinin rəhbəri Arzu Əliyeva Bakı Bulvarında keçirilən "CandyFest" yay festivalını ziyarət ediblər.
AZƏRTAC-a istinadən xəbər verilir ki, qonaqlara festival barədə ətraflı məlumat verilib. İyunun 1-dən başlayan festival iyulun sonunadək davam edəcək. Hər gün saat 17:00-dan 19:00-dək uşaqlar üçün tamaşalar, oyunlar və əyləncə proqramları təşkil olunur.
Ziyarət zamanı Leyla Əliyeva və Arzu Əliyeva yarmarka ərazisi və köşklərə baş çəkiblər. Qonaqlar təamların dadına baxıb, ziyarətçilərlə görüşüb, şəkillər çəkdiriblər. Onlara müxtəlif hədiyyələr təqdim olunub.
Daha sonra qonaqlar açıq səma altında "Sehrli mirvari" su sirki şousunu izləyiblər. Nağıl qəhrəmanlarının iştirakı ilə işıq, musiqi və akrobatik elementlər yer alıb.
