Avropa Komissiyası yanında Mənzil İşçi Qrupunun rəhbəri Metyu Bolduin Bakıda keçirilən Ümumdünya Şəhərsalma Forumunda (WUF13) bildirib ki, mənzil böhranı artıq sosial sabitlik və demokratik institutlar üçün ciddi təhdidə çevrilib.
Bolduin qeyd edib ki, xüsusilə gənclər, həssas qruplar və evsizlər üçün əlçatan mənzil tapmaq getdikcə çətinləşir. Bu, bazar və ya siyasət uğursuzluğu olsa da, problem təcili həll tələb edir.
Mənzil probleminin həll olunmaması cəmiyyətdə narazılığı artırır, sosial həmrəyliyi zəiflədir və demokratiya üçün risk yaradır. Bolduin vurğulayıb ki, Aİ ölkələrinin fərqli siyasətləri olsa da, ortaq məqsəd əlçatan mənzili prioritetə çevirməkdir.
Yaxın vaxtlarda Əlçatan Mənzil Aktı təqdim ediləcək. Bu, şəhərlərə qısamüddətli kirayə və yaşayış sahələrinin qeyri-yaşayış məqsədilə istifadəsinə qarşı geniş hüquqi imkanlar verəcək. Həmçinin tikinti, yenidənqurma və boş mənzillərin bazara qaytarılması üçün qanunvericilik sadələşdirilir. Əsas prioritetlərdən biri də mənzil sektoruna maliyyə resurslarının cəlb edilməsidir.
