Minalar Ermənistan-Azərbaycan münaqişəsinin ən ağır miraslarından biri olaraq qalır və döyüşlər bitdikdən sonra da insan həyatına son qoymağa davam edir.
Azərbaycan Prezidentinin köməkçisi Hikmət Hacıyev bildirib ki, 2020-ci il noyabrın 10-dan etibarən mina partlayışları nəticəsində 427 nəfər qurban qeydə alınıb. Onlardan 73-ü həlak olub, 354-ü yaralanıb. Zərərçəkənlər arasında 231 mülki şəxs var.
1991-ci ildən bu günədək ümumi mina qurbanlarının sayı 3 500 nəfəri keçib. Qurbanlar arasında 362 uşaq və gənc, 38 qadın var.
Genişmiqyaslı mina çirklənməsi məcburi köçkünlərin təhlükəsiz qayıtmasına, azad edilmiş ərazilərin yenidən qurulmasına, iqtisadi inkişafa və kənd təsərrüfatının bərpasına mane olur. Hər bir minanın zərərsizləşdirilməsi insan həyatını xilas edir və bərpa prosesinə töhfə verir.
Mina təmizlənməsi təkcə təhlükəsizlik deyil, həm də humanitar zərurət və dayanıqlı inkişaf üçün vacib şərtdir.
