Milli Məclisdə Naxçıvanla bağlı mühüm qərar verildi. Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəliyi 1-ci kateqoriya dövlət orqanı statusuna malik olacaq.
Oxu.Az xəbər verir ki, bununla bağlı dəyişikliklər "Dövlət qulluğu haqqında" qanuna təklif edilən dəyişikliklər parlamentin bugünkü plenar iclasında müzakirəyə çıxarılıb.
Qanun layihəsi Azərbaycan Respublikasında həyata keçirilən genişmiqyaslı struktur və idarəetmə islahatlarının tərkib hissəsi kimi Naxçıvan Muxtar Respublikasında (MR) idarəçilik modelinin təkmilləşdirilməsi məqsədilə hazırlanıb.
Prezidentinin səlahiyyətli nümayəndəliyi MR-də dövlət başçısının müəyyən etdiyi vəzifələri yerinə yetirən icra orqanıdır.
Nümayəndəliyə rəhbərliyi Prezident tərəfindən vəzifəyə təyin və vəzifədən azad edilən, birbaşa ona tabe olan MR-dəki səlahiyyətli nümayəndə həyata keçirir.
Təklif edilən digər dəyişikliklərə əsasən, Naxçıvanda Prezidentin səlahiyyətli nümayəndəsi və onun müavinləri vəzifələri inzibati vəzifələr təsnifatından çıxarılır, MR-də Prezidentin səlahiyyətli nümayəndəsinin köməkçisi vəzifəsi isə üçüncü təsnifat vəzifələr siyahısına daxil edilir.
Bu dəyişiklikdən sonra "Dövlət qulluğu haqqında" AR Qanunu Naxçıvan MR-də Prezidentin səlahiyyətli nümayəndəsi və onun müavinlərinə şamil olunmayacaq.
Məsələ müzakirələrdən sonra səsə qoyularaq birinci oxunuşda qəbul edilib.
