Ekologiya və təbii sərvətlər naziri Rəşad İsmayılov Bakıda keçirilən Dünya Şəhərsalma Forumu (WUF13) çərçivəsində çıxış edib.
O bildirib ki, Paris Sazişi çərçivəsində milli hədəflərimiz 2035-ci ilədək istilik effekti yaradan qazların emissiyalarının 40% azaldılmasını nəzərdə tutur.
Nazir vurğulayıb: "Strateji Ekoloji Qiymətləndirmə planlaşdırmada mövcud strateji sənədlərlə uzlaşmanı tələb edir. Bu yanaşma ilə biz gələcək fəaliyyətlərimizin karbon izini və potensial ekoloji risklərini əvvəlcədən müəyyən edə, alternativ inkişaf variantlarını qiymətləndirə bilirik."
"Böyük Qayıdış" proqramı çərçivəsində Qarabağ və Şərqi Zəngəzurda ekosistemlərin bərpası və şəhərlərin yenidən canlandırılmasında Strateji Ekoloji Qiymətləndirmənin tətbiqi vacib rol oynayıb.
Nazir qeyd edib ki, bu gün dünyada, o cümlədən Şərqi Avropa və Cənubi Qafqazda Strateji Ekoloji Qiymətləndirməyə maraq artır: "Azərbaycanda şəhərsalma sahəsində geniş təcrübə formalaşıb."
BMT-nin Avropa üzrə İqtisadi Komissiyası bu alətin qlobal təşviqində mühüm rol oynayır və ölkəmizlə birgə uğurlu fəaliyyəti mövcuddur.
