Ermənistanın baş naziri Nikol Paşinyan parlamentdə çıxış edərək, Azərbaycanla sülh prosesinə qarşı çıxan siyasi qüvvələrə qarşı mübarizə aparmağa çağırıb.
Paşinyan qeyd edib ki, hazırda "üçbaşlı müharibə partiyası" adlanan qüvvə sülh sazişini təhlükə altına qoyur. O, parlamentdə sülhü qəbul etməyən bir qrupun olduğunu, bunun təhdidlər yaratdığını vurğulayıb.
"Üçbaşlı müharibə partiyası" dedikdə Paşinyan "Güclü Ermənistan", "Ermənistan" bloku və "Çiçəklənən Ermənistan" partiyalarını nəzərdə tutur. O, bu qüvvələrin casus şəbəkəsi olduğunu və seçiciləri ələ alaraq səs qazandıqlarını iddia edib.
Baş nazir vurğulayıb ki, bu şəbəkənin kökü kəsilməlidir, əks halda onlar münaqişəni yenidən qızışdıra bilərlər. O, xalqı da vəziyyəti dərk etməyə çağırıb.
