Azərbaycan Respublikasının Prezidenti İlham Əliyev iyunun 24-də İran İslam Şurası Məclisinin sədri Məhəmməd Baqir Qalibafın başçılıq etdiyi nümayəndə heyətini qəbul edib.
Prezident İlham Əliyev son vaxtlar qardaş İran xalqının çəkdiyi əziyyətləri vurğulayıb, müharibədə həlak olanlara Allahdan rəhmət diləyib.
Müharibə dövründə Azərbaycanın İranın yanında olduğunu deyən Prezident İlham Əliyev, İran Prezidenti Məsud Pezeşkianla telefon danışıqlarını və digər təmasları həmrəylik nümunəsi kimi qiymətləndirib.
Müharibənin dayandırılmasının Azərbaycanda sevinclə qarşılandığını vurğulayan dövlət başçısı, bununla bağlı rəsmi bəyanatın verildiyini xatırladıb.
"Arzu edirəm ki, bölgədə heç bir müharibə olmasın", - deyən Prezident İlham Əliyev, həm Azərbaycanın, həm də İranın müharibələrdən əziyyət çəkdiyini qeyd edib.
Məhəmməd Baqir Qalibafın əvvəlki səfərini məmnunluqla xatırlayan Prezident, onun İƏT Parlament İttifaqı Konfransının 20-ci Sessiyasında iştirakının əhəmiyyətinə toxunub.
Prezident İlham Əliyev, bu tədbirin İslam həmrəyliyinə töhfə verəcəyinə ümidvar olduğunu bildirib, gələn il ölkəmizin İƏT Zirvə Görüşünə ev sahibliyi edəcəyini və hazırlıqların başlandığını qeyd edib.
Prezident, Məhəmməd Baqir Qalibafın səfərinin ikitərəfli gündəliyin müzakirəsi üçün yaxşı imkan yaradacağını vurğulayıb.
Dövlət başçısı Azərbaycan-İran münasibətlərinin uğurlu inkişafına da toxunub.
Görüşdən məmnunluğunu bildirən qonaq, İran Prezidenti Məsud Pezeşkianın salamlarını Prezident İlham Əliyevə çatdırıb.
Prezident İlham Əliyev salamlar üçün təşəkkür edib, onun salamlarının da Məsud Pezeşkiana çatdırılmasını xahiş edib.
Məhəmməd Baqir Qalibaf, İranın çətin günlərində Prezident İlham Əliyev, Azərbaycan dövləti və xalqı tərəfindən göstərilən dəstəyə görə minnətdarlığını bildirib.
Qonaq, həmçinin İran səfirliyinə gələrək başsağlığı verməsinə və Ayətullah Xameneinin seçilməsi münasibətilə təbrik məktubuna görə təşəkkür edib.
Müharibənin böyük dərd olduğunu deyən qonaq, Azərbaycanın mehriban qonşuluq münasibətlərinə sadiq qaldığını, humanitar yardımı əsirgəmədiyini vurğulayıb, bunun İran xalqının yaddaşında qalacağını bildirib.
Məhəmməd Baqir Qalibaf, Azərbaycanla İranın çətin günlərdə bir-birinin yanında olduğunu, bunun birlik nümunəsi olduğunu qeyd edib. Müharibənin İrana müsəlman ölkələri ilə təmasların vacibliyini göstərdiyini bildirib.
Qonaq, İranın müharibə dövründə dostunu və düşmənini tanıdığını, dost kimi Azərbaycanın yanında olduğunu söyləyib.
Söhbət zamanı Azərbaycan-İran əlaqələrinin dinamik inkişafına əminlik ifadə olunub, Ağbənd-Kəlalə körpüsünün tikintisinin başa çatdırıldığı, Araz dəhlizinin regionda nəqliyyat imkanlarını artıracağı vurğulanıb.
Görüşdə ikitərəfli əlaqələrin perspektivləri, o cümlədən parlamentlərarası əməkdaşlıq müzakirə olunub, hökumətlərarası komissiyanın fəaliyyətinə toxunulub.
