Ukraynanın Kiyev Milli İnşaat və Memarlıq Universitetinin nümayəndə heyəti Bakıda keçirilən 13-cü Ümumdünya Şəhərsalma Forumunda (WUF13) iştirak edir. Onlar Elm və Təhsil Nazirliyində görüş keçiriblər.
Görüşdə universitetin rektoru Oleksiy Dniprov bildirib ki, Akademik Şuranın qərarı ilə Azərbaycan Prezidenti İlham Əliyevə Kiyev Milli İnşaat və Memarlıq Universitetinin fəxri doktoru adı verilib.
Rektor qeyd edib ki, dövlət başçısı müasir təhsil, elm və şəhərsalma sahəsindəki töhfələrinə, həmçinin Ukrayna-Azərbaycan əlaqələrinin möhkəmləndirilməsindəki səylərinə görə bu ada layiq görülüb. Diplom elm və təhsil nazirinin müavininə təqdim edilib.
Görüşdə həmçinin iki ölkənin ali məktəbləri arasında əməkdaşlıq və təhsil sahəsində qarşılıqlı fəaliyyətin genişləndirilməsi müzakirə edilib.
