Mayın 28-də Prezident İlham Əliyev Xankəndi şəhərində əsaslı yenidənqurmadan sonra Mədəniyyət Mərkəzinin açılışında iştirak edib.
Xankəndi, Xocalı və Ağdərə rayonlarında Prezidentin xüsusi nümayəndəsi Elçin Yusubov dövlət başçısına görülən işlər barədə məlumat verib.
XX əsrin 60-70-ci illərində tikilən binanın yükdaşıyan konstruksiyalarında aşınmalar və deformasiyalar mövcud idi. Yenidənqurma nəticəsində mərkəzdə mədəni-kütləvi tədbirlər, kino, səhnə fəaliyyəti, yaradıcılıq təlimləri və turizm xidmətləri üçün şərait yaradılıb.
Üçmərtəbəli binada akt və kino zalları, dərnək otaqları, qrim otaqları, bufet, kassa və suvenir mağazası var. 348 yerlik zal konsert, tamaşa, film nümayişi və rəsmi görüşlərə ev sahibliyi edəcək.
Bu mərkəz Xankəndinin mədəni həyatının canlanmasında mühüm rol oynayacaq. Prezident İlham Əliyevin rəhbərliyi ilə işğaldan azad edilmiş ərazilərdə mədəni abidələrin bərpasına xüsusi diqqət yetirilir.
