İyunun 23-də Azərbaycan Prezidenti İlham Əliyev və Türkmənistan Prezidenti Sərdar Berdiməhəmmədov Şuşa məscidində tikinti işlərinin gedişi ilə tanış olublar.
Prezidentin köməkçisi Anar Ələkbərov dövlət başçılarına məsciddə görülmüş işlər barədə məlumat verib.
Təməli 2021-ci ildə qoyulan məscid tarixi şəhərin yeni müasir rəmzi kimi ucalır. Zəfər Gününün rəmzi olaraq 8 rəqəmi formasında inşa edilən məscid əsas və inzibati binalardan, kişi və qadın dəstəmazxanalarından ibarət olacaq.
Hündürlüyü 73 metr olan iki minarə Şuşanın ilin on birinci ayında azad edilməsinin rəmzi kimi 11 rəqəmini simvolizə edir. Xarici səth Şuşanın qədim məscidinin naxışları ilə bəzədiləcək.
Tikinti "Paşa Holdinq"in dəstəyi ilə həyata keçirilir. Bu məscid işğaldan azad olunan ərazilərdə bərpa və quruculuq işlərinin mühüm layihəsidir.
