“Qərbi Azərbaycana qayıdış” ideyası bu gün Azərbaycan dövlətinin və millətinin strateji hədəfidir. O torpaqlara qayıdış beynəlxalq hüquqa söykənən haqqımızdır. 44 günlük Vətən müharibəsindən sonra tarixi torpaqlarımıza qayıdış milli ideyamızdır.
Oxu.Az xəbər verir ki, bu barədə “Qərbi Azərbaycana Qayıdış: Milli İdeyanın Yeni Mərhələsi kimi” I Beynəlxalq Konfrans çərçivəsində jurnalistlərə açıqlamasında Qərbi Azərbaycan İcmasının sədri Əziz Ələkbərli deyib.
O bildirib ki, son zamanlar Azərbaycan Prezidenti ilə Ermənistanın baş naziri arasında aparılan danışıqlar bölgəyə sülhün əbədi olaraq gəlməsi üçün böyük inam yaradır: “Biz dövlət başçılarının bu təşəbbüsünü alqışlayırıq və həmin danışıqlara tarixi torpaqlarımıza qayıdış üçün bir imkan kimi baxırıq.”
Buna baxmayaraq, tarixi torpaqlarımız olan Qərbi Azərbaycanda, indiki Ermənistan ərazisində soydaşlarımız yüzillər, minillər boyu çox zəngin mədəni irs yaradıblar. Bu irsin öyrənilməsi, Qərbi Azərbaycanla bağlı tarixi həqiqətlərin xalqımıza və dünya ictimaiyyətinə çatdırılması Qərbi Azərbaycan İcmasının qarşısında əsas hədəf olaraq dayanır.
Ə.Ələkbərli qeyd edib ki, Qərbi Azərbaycan İcması həm beynəlxalq, həm də ölkədaxili tədbirlər vasitəsilə öz təbliğat və təşviqat işini davam etdirir: “Eyni zamanda arxiv materialları araşdırılır. Bu günə qədər elmi dövriyyəyə daxil olmayan mənbələr üzə çıxarılır, xəritələr aşkarlanır. Qərbi Azərbaycan İcması bu məsələ ilə bağlı digər əlaqədar qurumlarla birlikdə sistemli və ardıcıl iş aparır.”
Daha çox foto burada: PhotoStock.az
