Urbanizasiya problemlərinin miqyası daha əlaqələndirilmiş və inklüziv fəaliyyət tələb edir.
Bu fikirləri BMT-nin Məskunlaşma Proqramının (UN-Habitat) icraçı direktoru Anaklaudia Rossbax Ümumdünya Şəhərsalma Forumunun (WUF) rəsmi açılış mərasimindən əvvəl keçirilən mətbuat konfransında deyib.
Rossbax bildirib ki, WUF13 dialoqdan icraya keçmək üçün mühüm platformadır. O, vurğulayıb ki, forum dayanıqlı urbanizasiya sahəsində aparıcı qlobal platforma olaraq, Bakıda keçirilməklə Azərbaycanın dayanıqlı şəhər inkişafındakı rolunu əks etdirir.
A.Rossbax qeyd edib ki, WUF13 UN-Habitat tərəfindən indiyədək təşkil olunmuş ən böyük forumdur. Forumda 182 ölkədən 41 mindən çox iştirakçı, o cümlədən dövlət başçıları, nazirlər, merlər, BMT rəsmiləri, biznes və vətəndaş cəmiyyəti liderləri yer alır.
O əlavə edib ki, qlobal konsensusun artmasına baxmayaraq, siyasi ambisiyalarla onların icrası arasında fərq böyük qalır. WUF13 bu fərqi aradan qaldırmaq üçün fəaliyyət platforması rolunu oynayır və transformativ şəhər dəyişikliklərinə sadiq qlobal koalisiyanı bir araya gətirir.
