Türk Dövlətləri Təşkilatı (TDT) sürətli dəyişikliklər keçirir. Bu gün təşkilat təkcə mədəni platforma deyil, həm də texnoloji, iqtisadi və hərbi-siyasi inteqrasiya mexanizminə çevrilir.
Oxu.Az xəbər verir ki, Türküstanda keçiriləcək qeyri-rəsmi sammit ərəfəsində azərbaycanlı və qazaxıstanlı ekspertlər "24kz" telekanalında türk dövlətlərinin əməkdaşlığını müzakirə ediblər.
Milli Məclisin deputatı Fariz İsmayılzadə qeyd edib: "Son illərdə TDT dinamik inkişaf edir. İqtisadi əlaqələrlə başlasaq da, indi təhlükəsizlik, müdafiə sənayesi, İT və kibertəhlükəsizlik prioritetdir."
Deputat vurğulayıb ki, üzv dövlətlər bilik mübadiləsi aparır, startap və təhsil proqramları həyata keçirirlər: "Sammit qeyri-rəsmi olsa da, tərəfdaşlığı möhkəmləndirəcək."
Xarici Siyasət Tədqiqatları İnstitutunun eksperti Almat Toekin bildirib ki, sammitdə rəqəmsallaşma və süni intellekt məsələləri diqqət mərkəzində olacaq. O qeyd edib: "Geosiyasi gərginliklər fonunda TDT ölkələri iqtisadi tərəqqi və sabitlik nümayiş etdirir."
Toekin əlavə edib ki, ittifaqın tamhüquqlu siyasi birliyə çevrilməsi mümkündür: "Hazırda hüquqi sənədlər paketi formalaşdırılır. Gələcəkdə Avropa İttifaqı modelinə keçid ehtimalı yüksəkdir."
