Donald Trampın Çinə səfəri əvvəlcədən planlaşdırılmış və İranla müharibə səbəbindən təxirə salınmışdı. Nəhayət bu səfər baş tutdu.
Politoloq Natiq Miri Oxu.Az-a açıqlamasında deyib ki, Trampın səfərində əsas mövzulardan biri ABŞ-Çin münasibətlərindəki problemlər olub.
Tramp ikinci dəfə hakimiyyətə gələndən sonra Çinə tətbiq etdiyi əlavə rüsumlar Pekini narahat edirdi. Çin də analoji addımlar atdı. Bu iki hegemon ölkə arasındakı ticari problemlər dünya siyasətinə təsirsiz ötüşmür.
ABŞ prezidenti özü ilə bərabər dünyanın ən varlı şirkət sahiblərini də Çin paytaxtına apardı. Danışıqlarda müsbət irəliləyişlər əldə olundu.
Müzakirə predmetlərindən biri də ABŞ-İran münaqişəsi olub. Çin və ABŞ iki məsələdə ortaq məxrəcə gəliblər: Hörmüz boğazının açılması və İranın nüvə silahına malik olmaması.
Tramp Si Cinpinlə görüşdə Çinin İrana silah satışını dayandırmasını müzakirə edib. Si Cinpin bu barədə söz verib. Tayvan problemi ilə bağlı da anlaşma əldə edilib.
Tramp Çinin İran neftini almağı dayandırmasını təklif edib. Çin digər mənbələrdən neft tədarük edə bilər ki, bu da İranın iqtisadi çökməsinə səbəb ola bilər.
Rusiya Prezidenti Vladimir Putinin də Çin səfəri gözlənilir. Bu səfər Trampın səfərindən sonra planlaşdırılıb və Rusiyanın narahatlığını göstərir.
Moskvanın neft və qazının böyük hissəsini Çin alır. Enerji məhsullarına məhdudiyyətlər qoyulsa, Rusiyanın büdcə gəlirləri çökəcək.
