Türküstan Bəyannaməsinə əsasən, "e-Permit" sisteminin tam işə salınması və Milli Vahid Pəncərənin inteqrasiyası Transxəzər Beynəlxalq Nəqliyyat Marşrutu (Orta Dəhliz) üzrə yükdaşımaların səmərəliliyini və şəffaflığını artıracaq.
Bu barədə TDT-nin qeyri-rəsmi sammitinin yekunları üzrə qəbul edilmiş Türküstan Bəyannaməsində qeyd olunub. Sənəddə liderlər "Rəqəmsal İpək Yolu" layihəsinin təşviqinə çağırır.
Həmçinin dövlət başçıları TDT-yə üzv dövlətlərin Nəqliyyat nazirlikləri arasında "e-CMR" sisteminin tətbiqinə dair 23 aprel 2026-cı il tarixində Bişkekdə Anlaşma Memorandumunun imzalanmasını alqışlayır.
"Transsərhəd sənədləşmənin sadələşdirilməsi, inzibati maneələrin azaldılması, yüklərin real vaxt rejimində izlənilməsi və Orta Dəhliz üzrə yükdaşımaların səmərəliliyinin artırılması üçün 'e-Permit' sisteminin tam işə salınmasını alqışlayırıq", - deyə bəyannamədə bildirilir.
Beynəlxalq yükdaşımalara dəstək üçün "e-TIR" prosedurunun gələcək tətbiqinin vacibliyi vurğulanıb.
