Bakıda keçirilən WUF13 - Ümumdünya Şəhərsalma Forumunun 13-cü sessiyası Azərbaycanın qlobal dialoq, dayanıqlı inkişaf və çoxtərəfli əməkdaşlıq platforması kimi rolunu təsdiqləyir. Bunu Milli Məclisin Səhiyyə komitəsinin üzvü Müşfiq Məmmədli Oxu.Az-a açıqlamasında bildirib.
Deputat qeyd edib ki, 176 ölkədən 57 mindən çox iştirakçının qatıldığı forum tarixdə ən genişmiqyaslı WUF sessiyası olub və COP29-dan sonra ölkəmizdə təşkil olunan ikinci ən böyük qlobal tədbir kimi yadda qalıb. “Bu fakt Azərbaycanın beynəlxalq etimad qazanan, böyükmiqyaslı tədbirləri yüksək səviyyədə təşkil edən ölkə statusunu nümayiş etdirir”, - deyə o vurğulayıb.
Məmmədli əlavə edib ki, Prezident İlham Əliyevin təşəbbüsü ilə WUF tarixində ilk dəfə Liderlərin Bəyanatları Sessiyasının keçirilməsi Azərbaycanın siyasi dialoq üçün yeni platformalar yaratmaq qabiliyyətini ortaya qoyub. Onlarla dövlət və hökumət başçısının iştirakı ölkənin qlobal strateji tərəfdaş kimi qəbul edildiyini göstərir.
Nazirlər görüşünün yekun sənədində Azərbaycanın qonaqpərvərliyi, forumun uğurlu təşkili, Prezidentin liderliyi və postmünaqişə dövründə bərpa-quruculuq siyasəti yüksək qiymətləndirilib. Bu, işğaldan azad olunmuş ərazilərdə yenidənqurma proseslərinin beynəlxalq nümunə kimi qəbul edilməsinin göstəricisidir.
Deputat vurğulayıb ki, Azərbaycan forumda yalnız ev sahibi deyil, həm də təcrübəsini təqdim edən ölkə kimi çıxış edib. Qarabağ və Şərqi Zəngəzurda “ağıllı şəhər” və “ağıllı kənd” konsepsiyaları, “Böyük Qayıdış” proqramı, ekoloji yanaşmalar müasir şəhərsalmanın praktiki modeli kimi diqqət çəkib.
“Nəfəs alan şəhərlər naminə Bakı Çağırışı”, Bakı Şəhər Mükafatının təsis edilməsi və gələcək WUF sessiyaları üçün Bakı standartlarının formalaşdırılması Azərbaycanın forumun qalıcı irsinə töhfəsini göstərir. O cümlədən, ölkəmiz qlobal şəhərsalma gündəliyinə yeni yanaşmalar gətirən təşəbbüskar tərəfdaşdır.
WUF13 Azərbaycanın beynəlxalq nüfuzunu möhkəmləndirib, postmünaqişə reallıqlarını dünyaya çatdırıb və dayanıqlı inkişaf, şəhərsalma, humanitar əməkdaşlıq sahəsində mövqeyini gücləndirib. Bakı bir daha qlobal çağırışların müzakirə olunduğu etibarlı dialoq məkanı olduğunu sübut edib.
