Azərbaycan BMT-nin Ümumdünya Şəhərsalma Forumunun 13-cü Sessiyasını (WUF13) yüksək səviyyədə təşkil edərək beynəlxalq sınaqdan uğurla çıxdı. Ölkəmiz həm təşkilatçılıq bacarığını, həm də qlobal şəhərsalma çağırışlarına yaradıcı yanaşmasını nümayiş etdirdi.
Forumun davam etdiyi altı gün ərzində Azərbaycanın elmi-texnoloji yeniliklərə əsaslanan təcrübəsi, xüsusilə işğaldan azad edilmiş ərazilərdə tətbiq olunan "ağıllı şəhər", "ağıllı kənd" və "yaşıl zona" layihələri beynəlxalq birliyin rəğbətini qazandı.
Beynəlxalq mətbuat WUF13-ü qlobal şəhərsalma gündəmini müəyyən edən platforma kimi xarakterizə edib. Forumda müzakirə olunan iqlim dözümlülüyü, mənzil əlçatanlığı və rəqəmsal transformasiya mövzuları dünyanın aparıcı xəbər agentliklərinin manşetinə çevrilib.
WUF13 ilk gündən etibarən Türkiyə mediası tərəfindən böyük maraqla qarşılanıb. "Anadolu Ajansı", "TRT Haber", "CNN Türk" kimi qurumlar forumu region və dünya üçün mühüm platforma kimi təqdim edib.
İran, Pakistan, Rusiya, Hindistan, Qazaxıstan, Özbəkistan, Gürcüstan, Ukrayna, Misir, BƏƏ, Səudiyyə Ərəbistanı, Çin, İndoneziya, Malayziya, Vyetnam, ABŞ, Fransa, Almaniya, İtaliya, İspaniya, Böyük Britaniya, Tacikistan, Qırğızıstan, Macarıstan və Bolqarıstan mediası da WUF13 barədə geniş materiallar yayımlayıb.
Dünya mətbuatı Forumun ilk günündən sonunadək Azərbaycanın yaşıl inkişaf, "ağıllı" şəhərlər və inklüziv mənzil siyasəti üzrə innovativ həllərini qlobal gündəmin əsas prioriteti kimi diqqət mərkəzində saxlayıb.
Beləliklə, Bakı platforması iqtisadi inkişaf səviyyəsindən asılı olmayaraq, bütün ölkələrin maraqlarını birləşdirən nadir dialoq mərkəzinə çevrilib. Azərbaycan isə gələcəyin dayanıqlı şəhər modellərini formalaşdıran strateji güc mərkəzi statusunu təsdiq edib.
