Yaxın Şərqdə gərginlik yenidən pik həddə çatıb. İsrailin Beyrutun cənubuna endirdiyi zərbələrdən sonra İran İsrailə raket hücumları ilə cavab verib. İsrail ordusu isə İranın qərb və mərkəzi bölgələrindəki hərbi hədəfləri vurduğunu açıqlayıb.
Beləliklə, aprel ayında əldə olunan kövrək atəşkəsdən sonra İran və İsrail arasında birbaşa qarşıdurma yenidən təhlükəli mərhələyə keçib.
Hadisələrin başlanğıc nöqtəsi Livan olub. İsrail ordusu Beyrutun cənub ətrafında, "Hizbullah"ın əsas dayaq məntəqələrindən biri sayılan Dahiye bölgəsindəki hədəfləri vurduğunu bildirib. İsrail bunu "Hizbullah"ın hücumlarına cavab kimi təqdim edir.
Livan mənbələri isə hücum nəticəsində ölən və yaralananların olduğunu açıqlayıb.
Tehran hadisəni "qırmızı xətlərin keçilməsi" kimi qiymətləndirərək İsrailə raket zərbələri endirib. Bu addım qarşıdurmanın birbaşa dövlətlərarası müstəviyə keçə biləcəyini göstərir.
ABŞ-nin vasitəçiliyi ilə İsrail və Livan arasında gərginliyin azaldılması üçün mexanizmlər müzakirə olunurdu. Lakin "Hizbullah" yeni atəşkəs planını rədd etmişdi. İsrailin Beyruta zərbələri diplomatik prosesə zərbə kimi qiymətləndirilir.
Politoloq Telman Nüsrətoğlu: "İran-İsrail qarşıdurması Yaxın Şərqdə güc və nüfuz uğrunda mübarizənin bir hissəsidir. Tərəflər regionda üstün mövqelər əldə etməyə çalışırlar."
