Zəngəzur dəhlizi yalnız Azərbaycanın əsas hissəsi ilə Naxçıvan arasında birbaşa quru əlaqəsini bərpa etməyəcək, həm də şərq-qərb və şimal-cənub beynəlxalq nəqliyyat dəhlizlərini birləşdirən strateji bir xətt rolunu oynayacaq.
Bunu Azərbaycan Respublikası Prezidentinin Cəbrayıl, Qubadlı və Zəngilan rayonları üzrə xüsusi nümayəndəsi Vahid Hacıyev deyib.
O, WUF çərçivəsində Azərbaycan pavilyonunda keçirilən "Urbisiddən Dirçəlişə" adlı tədbirdə çıxış edib.
Yenidənqurma prosesinin strateji istiqamətlərindən biri kimi Zəngəzur dəhlizinin əhəmiyyətini vurğulayan Hacıyev bildirib ki, bu ərazi tarixən İpək Yolu üzərində yerləşib.
"Bu gün Qarabağ və Şərqi Zəngəzur yenidən əsas regional bağlantı mərkəzinə çevrilir", – deyə o qeyd edib.
Dəhliz layihəsi çərçivəsində Horadiz-Ağbənd avtomobil yolu və dəmir yolu xətti demək olar ki, tamamlanıb.
Zəngəzur dəhlizinin reallaşdırılması regionda dairəvi dəmir yolu şəbəkəsi yaradacaq və Azərbaycanın illik yükdaşıma potensialını təxminən 15 milyon ton artıracaq.
Artıq fəaliyyət göstərən Zəngilan Beynəlxalq Hava Limanı da yük daşımalarının hərəkətliliyini yaxşılaşdıracaq.
Hacıyev qeyd edib ki, dəhliz tam başa çatmadan belə logistika, istehsal və sənaye şirkətləri regiona ciddi maraq göstərir.
