Azərbaycanlı gənc peşəkar Məryəm Novruzi dünyanın ən nüfuzlu memarlıq şirkətlərindən olan "Zaha Hadid Architects"də biznesin inkişafı üzrə menecer təyin olunub.
24 yaşlı mütəxəssis fəaliyyətini şirkətin London ofisində davam etdirəcək. Bu nailiyyət beynəlxalq arenada uğur qazanmaq istəyən gənclər üçün ilhamverici nümunədir.
Məryəm Novruzi daha öncə "Greymore" hüquq şirkətində biznesin inkişafı, beynəlxalq tərəfdaşlıqlar və strateji kommunikasiya sahəsində çalışıb.
O, sosial media və şəxsi brend sahəsində də aktivdir. Gənclər arasında motivasiya, özünüinkişaf və sağlam həyat tərzi mövzularında milyonlarla baxış toplayan çıxışları ilə tanınır.
"Zaha Hadid Architects" innovativ layihələri ilə tanınan prestijli bir şirkətdir. Məryəm yeni vəzifəsi ilə bağlı bildirib: "Azərbaycanlı kimi belə bir şirkətdə təmsil olunmaq qürurdur. Gənclər öz inkişaflarına fokuslanmalı, böyük məqsədlər qurmaqdan qorxmamalıdır."
