Artezian və subartezian quyuları yeraltı su mənbələri sayılır. Belə quyulardan istifadə etmək istəyən sahibkarlar icazə üçün müraciət etməlidir.
Bu barədə Oxu.Az-a Azərbaycan Dövlət Su Ehtiyatları Agentliyi (ADSEA) yanında Suların İstifadəsinə və Mühafizəsinə Dövlət Nəzarəti Xidmətindən məlumat verilib.
Bildirilib ki, qaydalar Su Məcəlləsinin tələblərindən irəli gəlir: "Suyun götürülməsi zamanı su obyektindən və məqsəddən asılı olaraq hər kubmetr su üçün rüsumlar çox cüzidir. Məqsəd maliyyə yükünü artırmaq deyil, uçot və hesabatlılığı təmin etməkdir."
Qurumdan əlavə edilib ki, bu tənzimləmə su obyektlərindən istifadə edənləri dəqiqləşdirəcək, qənaəti təşviq edəcək və ədalətli bölgüyə zəmin yaradacaq. Həmçinin qanunsuz istifadənin və çirklənmənin qarşısını almağa kömək edəcək.
