Bakının inkişafı tarix boyu su təminatı ilə sıx bağlı olub.
Oxu.Az xəbər verir ki, bunu Ekologiya və Təbii Sərvətlər Nazirliyi yanında İctimai Şuranın sədr müavini Amin Məmmədov Bakıda keçirilən Ümumdünya Şəhərsalma Forumu (WUF13) çərçivəsində təşkil olunan sessiyada deyib.
O bildirib ki, XIX əsrin ortalarında Bakıda neft ehtiyatlarının kəşfi şəhərin sürətlə böyüməsinə səbəb olub. Lakin artan əhalinin içməli su ilə təmin olunması əsas çağırışa çevrilib.
A.Məmmədovun sözlərinə görə, hələ 1917-ci ildə yerli milyonçular 170 kilometr məsafədən Bakıya su gətirmək üçün boru xətti çəkiblər. Sovet dövründə əlavə su mənbələri yaradılsa da, bunlar tələbatı ödəməyib.
2000-ci illərin əvvəllərində Bakının su ehtiyacını qarşılamaq üçün 160 kilometr uzaqda yeni su mənbəyi müəyyənləşdirilib və magistral kəmər çəkilib.
"Su təchizatı və kanalizasiya sisteminin yenilənməsi milyardlarla dollar investisiya tələb edib. Bununla belə, bu sahədə görülməli işlər hələ də çoxdur", - deyə o vurğulayıb.
A.Məmmədov əlavə edib ki, gələcək nəsillərin təmiz su və sanitariya xidmətlərinə çıxışı üçün davamlı investisiyalar vacibdir.
Onun fikrincə, su mərkəzli şəhərsalma memar, mühəndis və beynəlxalq ekspertlərin birgə fəaliyyətini tələb edir.
