Rusiyalı tibbi ekspert Yekaterina Demyanovskaya bildirib ki, üzgüçülük artıq çəkidən qurtulmağın ən zərərsiz və təhlükəsiz üsuludur.
O, "NEWS.ru" portalına müsahibəsində qeyd edib ki, akvaaerobika məşqləri də əlavə kaloriləri yandırmaq üçün səmərəlidir.
"Piylənmə probleminin həllinə ehtiyatla yanaşmaq lazımdır. Yüksək bədən kütlə indeksi ilə ağır məşqlər etmək oynaqlarda zədələrə, ürək-damar sistemində fəsadlara səbəb ola bilər", - deyə ekspert vurğulayıb.
Demyanovskaya ilkin mərhələdə su aerobikası və üzgüçülüklə başlamağı tövsiyə edir. O, həmçinin düzənlik ərazidə gəzintinin də faydalı olduğunu qeyd edib.
"Həftədə 2-3 saatlıq hərəkət kifayətdir. Nəbzin dəqiqədə 110 vuruşu keçməməsi şərtilə, gündəlik 15-20 dəqiqəlik gəzintilərlə başlamaq olar", - deyə o bildirib.
Məşq müddətinin tədricən artırılması lipid göstəricilərini və insulinə həssaslığı normallaşdırır. Suda idman onurğa və oynaqlara təzyiqi azaldır, əzələlərin inkişafına kömək edir.
