Müasir dövrdə uğurun vacib şərtlərindən biri effektiv ünsiyyət və özünü düzgün təqdimetmə bacarığıdır. Auditoriya qarşısında inamla çıxış etmək, fikirləri aydın ifadə etmək və şəxsi brend formalaşdırmaq həm peşəkar, həm də şəxsi inkişaf üçün böyük əhəmiyyət daşıyır.
Bu mövzuda Oxu.Az "StageLab" Natiqlik Bacarıqları Təliminin təsisçisi və təlimçisi Səyavuş Hüseynli ilə həmsöhbət olub. O, natiqlik sənətinin incəlikləri, şəxsi brendin formalaşdırılması, auditoriya ilə ünsiyyət və təlim proqramının digər kurslardan fərqləri barədə danışıb.
Səyavuş Hüseynli qeyd edir ki, "StageLab" sadəcə natiqlik kursu deyil, inkişaf platformasıdır. O, 200-dən çox gənc ifaçı ilə işləyib və təcrübəsini müxtəlif peşə sahiblərinə ötürür. Təlimin əsas məqsədi insanın daxili ruh halını düzəltmək, qorxu və həyəcanı idarə etməkdir.
Natiqlik üç əsas elementə söykənir: ruh halı, texniki göstəricilər (parazit sözlər, bədən dili) və çatdırılma (hekayələşdirmə). Hər üçü bir-birinə bağlıdır və psixoloji hazırlıq olmadan səlis nitq faydasızdır.
Ekspert vurğulayır ki, qorxu yad adam baxışı və mərkəzdə olmaqdan yaranır. Bunu tam aradan qaldırmaq mümkün deyil, amma idarə etmək olar. Yeganə yol təcrübədir: səhnəyə çıxmaq, danışmaq, real şəraitdə özünü sınamaq.
"StageLab" digər təlimlərdən fərqli olaraq kompleks yanaşma tətbiq edir. Əvvəlcə insanın daxili enerjisi və emosiyası üzərində işlənir, sonra texniki detallar öyrədilir. Təlim iştirakçıları həm səhnədə, həm də kamera qarşısında təcrübə qazanır, real çəkilişlər edərək özlərini analiz edirlər.
Şəxsi brendin formalaşması üçün Səyavuş Hüseynli media iştirakını və sənədləşməni vacib sayır. O, Vikipediya səhifəsinin yenilənməsinin, müsahibələrin və layihələrin qeydə alınmasının ekspert imici yaratmaqda rolunu vurğulayır.
Təlimin sonunda iştirakçılar psixoloji hazırlıq, səlis nitq və hekayələşdirmə bacarıqları qazanır. Onlar tənqidə düzgün yanaşmağı, mənfi rəylərdən təsirlənməməyi öyrənirlər.
