Azov dənizində gəmiyə PUA hücumu nəticəsində yaralanan Azərbaycan vətəndaşları vəziyyətləri barədə danışıblar.
Bosman Rəşad Mədətxanov bildirib: "Hazırda vəziyyətim yaxşıdır. Ailəmə demək istəyirəm ki, hər şey qaydasındadır".
Xəsarət alan digər həmyerlimiz Samid İbadlı deyib: "Bizə yaxşı xidmət edirlər. Burada yaşayan azərbaycanlılar da bizə baş çəkirlər".
Emin Valehov isə bildirib: "Həmvətənlərimiz bizi tək qoymur, maraqlanır, baş çəkirlər. Göstərilən xidmət də yaxşıdır".
Digər yaralı Namiq Cəfərli də Azərbaycan dövlətinə, səfirliyə və diasporaya təşəkkür edib.
Yeyskdəki Azərbaycan cəmiyyətinin sədri Fərhad Məmmədov APA-ya açıqlamasında bildirib ki, yaralılardan ikisinin vəziyyəti orta ağır, ikisininki normaldır. O, xəstəxanada onlara baş çəkdiyini və ehtiyaclarının qarşılandığını qeyd edib.
Yaralıların gələn həftə xəstəxanadan buraxılacağı, lakin sənədlərin itməsi səbəbindən prosesin uzanacağı bildirilir. Azərbaycan səfirliyi sənədlərin bərpası üzərində işləyir.
