Ümumdünya Şəhərsalma Forumunun 13-cü sessiyası (WUF13) ilə əlaqədar TƏBİB-in tabeliyindəki tibb müəssisələrində hazırlıq işləri görülüb.
Oxu.Az xəbər verir ki, bu barədə TƏBİB məlumat yayıb.
Tədbir müddətində 4 tibb müəssisəsi, o cümlədən Respublika Təcili və Təxirəsalınmaz Tibbi Yardım Mərkəzi gücləndirilmiş iş rejimində çalışacaq.
"Yeni Klinika"nın təcili yardım şöbələri, reanimasiya və əməliyyatxana tam hazırdır. Sabunçu Tibb Mərkəzinin yanında Modul Xəstəxana, yanıqlar üçün Mərkəzi Neftçilər Xəstəxanası və zəhərlənmələr üçün Kliniki Tibbi Mərkəzdə çarpayı fondu ayrılıb.
Tibbi avadanlıq, dərman və ləvazimatlar tam təmin edilib. Həmçinin 75 briqada və 35 təcili yardım maşını ayrılıb.
WUF13 çərçivəsində hotellər və tədbir ərazilərində tibb briqadaları 24/7 fəaliyyət göstərəcək. Ehtiyat nəqliyyat vasitələri də ayrılıb.
Heyət üçün təməl və təkmil həyat dəstəyi təlimlər keçirilib. WUF13 əməkdaşları və könüllülərə ilkin tibbi yardım təlimi verilib. Təlimlərdə həyati təhlükə qiymətləndirmə, reanimasiya, qanaxmaların dayandırılması və travma yardımı öyrədilib.
