Bakıda 2026-cı ildən etibarən dəyişkən iş qrafikinə keçid planlaşdırılır. Deputat Vüqar Bayramovun sözlərinə görə, "Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025-2030-cu illər üçün Dövlət Proqramı" çərçivəsində dövlət qurumları, təhsil və tibb müəssisələri, həmçinin digər hüquqi və fiziki şəxslər çevik iş qrafikinə keçəcək.
Hazırda Əmək və Əhalinin Sosial Müdafiəsi Nazirliyi, Elm və Təhsil Nazirliyi, Səhiyyə Nazirliyi, TƏBİB və Nəqliyyatı Əlaqələndirmə Şurası tərəfindən təhlillər aparılır. Nazirlər Kabineti tərəfindən təsdiq olunacaq siyahılar əsasında yeni iş rejimi tətbiq ediləcək.
Deputat qeyd edib ki, Avropada bu model uğurla tətbiq olunur və nəqliyyat sıxlığını azaldır, işçi məhsuldarlığını artırır. 2026-cı ildə Azərbaycanda da müəssisələr eyni saatda işə başlamayacaq, bu da pik saatlarda sıxlığı azaldacaq.
