Bakının bəzi ərazilərində içməli suyun verilməsində yaranan problem sakinlərin narazılığına səbəb olub.
Oxu.Az-ın qaynar xəttinə daxil olan şikayətdə Nizami rayonu, Rizvan Teymurov küçəsi, 36 ünvanında artıq iki gündür içməli su verilmədiyi bildirilir.
Sakinlər su təchizatındakı fasilənin gündəlik məişət işlərində ciddi çətinliklər yaratdığını deyir və problemin qısa zamanda həllini istəyirlər.
İri Şəhərlərin Birləşmiş Su Təchizatı Xidmətindən Oxu.Az-a cavab olaraq bildirilib ki, suyun verilməsindəki fasilələr tənzimləmə işləri ilə bağlıdır.
“Su anbarlarında qəbul edilən suyun miqdarını və sutəmizləyici qurğuların məhsuldarlığını artırmaq üçün texniki işlər davam edir. Bu səbəbdən verilən suyun həcmi müvəqqəti azaldılıb. Nəticədə müxtəlif rayonlarda suyun verilmə saatlarında 2-3 saatlıq azalmalar olur. Tənzimləmə işləri yekunlaşmaq üzrədir. İki gün ərzində su tədarükünü stabilləşdirmək mümkün olacaq”, - deyə məlumatda qeyd olunub.
Müvəqqəti qrafik rejimi: Xətai rayonu - 06:00-10:00, 18:00-22:00; Nizami rayonu - 06:00-10:00, 18:00-22:00; Suraxanı rayonu - 06:00-17:00, 06:00-19:00, 22:00-01:00; Binəqədi rayonu - 06:00-20:00; Nərimanov rayonu - 06:00-20:00; Yasamal rayonu - 06:00-10:00, 06:00-22:00, 18:00-22:00; Sabunçu rayonu - 08:00-12:00, 22:00-02:00; Xəzər rayonu - 00:00-12:00; Pirallahı rayonu - 08:00-17:00; Nəsimi rayonu - 06:00-10:00, 18:00-21:00.
Bəzi ünvanlarda yuxarı mərtəbələrə suyun çatdırılmasında çətinlik daha çoxdur. Belə yerlərdə su maşınları ilə xidmət göstərilir. Qeyd edək ki, tənzimləmə işləri sürətlə davam edir və yekunlaşmaq üzrədir. Abonentlərdən müvəqqəti narahatlığa görə üzr istəyirik”.
