Konstitusiya Məhkəməsi fiziki şəxslər arasında borc müqavilələri ilə bağlı mühüm qərar qəbul edib.
Bu barədə Oxu.Az-a Konstitusiya Məhkəməsinin Mətbuat Xidmətindən məlumat verilib.
Bildirilib ki, Konstitusiya Məhkəməsi Plenumunun Fərhad Abdullayevin sədrliyi ilə keçirilən iclasında Bakı Apellyasiya Məhkəməsinin müraciəti əsasında Azərbaycan Konstitusiyasının 13-cü maddəsinin I hissəsinin və 29-cu maddəsinin I və II hissələrinin tələbləri baxımından Mülki Məcəllənin 329.1, 337.1 və 739.2-ci maddələrinin əlaqəli şəkildə şərh edilməsinə dair konstitusiya işinə baxılıb.
Plenum iş üzrə hakim R.Quliyevin məruzəsini, Bakı Apellyasiya Məhkəməsinin müraciətini, Milli Məclis Aparatının mülahizəsini, eləcə də Ali Məhkəmə, Sumqayıt Apellyasiya Məhkəməsi, Naxçıvan Muxtar Respublikasının Ədliyyə Nazirliyi, Hüquqi Ekspertiza və Qanunvericilik Təşəbbüsləri Mərkəzi, Vəkillər Kollegiyası və ekspertlər tərəfindən təqdim olunmuş rəyləri araşdıraraq qərar qəbul edib.
Qərara əsasən, Mülki Məcəllənin 739.2-ci maddəsində nəzərdə tutulan borc müqaviləsinin yazılı forma tələbinin həmin Məcəllənin 329.1-ci maddəsində göstərilən "başqa hal" kimi nəzərə alınması üçün qanunvericiliyə müvafiq dəyişikliklərin edilməsi Milli Məclisə tövsiyə olunub.
Konstitusiya Məhkəməsi qeyd edib ki, məsələ qanunvericilik qaydasında həll edilənədək fiziki şəxslər arasında bağlanan borc müqavilələrinin və onların şərtlərinin müxtəlif yazılı sübutlarla təsdiqlənməsi imkanı istisna edilməməlidir.
Həmçinin qərarda vurğulanıb ki, mülki dövriyyənin sabitliyinin təmin olunması məqsədilə bu hüquqi mövqe qərarın qüvvəyə mindiyi tarixdən sonra yaranacaq borc münasibətlərinə və hazırda məhkəmələrin icraatında olan mübahisələrə şamil ediləcək.
Qərar dərc edildiyi gündən qüvvəyə minir və qətidir. O, heç bir orqan və ya şəxs tərəfindən ləğv edilə, dəyişdirilə və ya rəsmi şəkildə təfsir oluna bilməz.
