Avropa İttifaqı Braziliyadan ət idxalına qadağa tətbiq edib. Buna səbəb sanitariya standartlarına uyğunsuzluqdur. Azərbaycan da Braziliyadan böyük həcmdə ət alır.
Satıcı Abbas Vəliyev bildirib ki, can əti qiymətinə satdıqları ətin kiloqramı 16 manatdır: "Tələbat yüksəkdir, əsas alıcılar kafe-restoranlardır. Məhsullar AQTA-nın sağlamlıq aktı ilə tərtib edilir."
Ekspertlər qeyd edir ki, ilin ilk 4 ayında ət idxalı artıb. Ölkəyə 15-16 min ton ət gətirilib ki, bu da ötən ilin eyni dövrü ilə müqayisədə 17-18% çoxdur.
İqtisadçı Asif İbrahimov deyir: "İribuynuzlu heyvanların sayı azalıb. Daxili tələbatı xarici bazardan qarşılayırıq. Qurban Bayramı yaxınlaşdıqca qiymətlərdə 10% artım ola bilər."
AQTA-dan bildirilib ki, Braziliyadan idxal olunan ətlərdə antibiotik qalıqları aşkarlanmayıb. İdxal yalnız beynəlxalq normalara uyğunluq təsdiq edildikdə icazəlidir.
