Mayın 18-də Bakıda Azərbaycan Prezidenti İlham Əliyev və Gürcüstan Baş naziri İrakli Kobaxidzenin iştirakı ilə BTQ dəmir yolu layihəsi üzrə Koordinasiya Şurasının 41-ci iclasının Protokolu imzalanıb.
Sənədlə modernləşdirmə işlərinin tamamlanması və yekun qəbulu təsdiq edilib.
Tədbir çərçivəsində ADY və Marabda-Kartsaxi Dəmir Yolu MMC-nin birgə müəssisəsi BTKI Railways MMC fəaliyyətə başlayıb.
2024-cü ildə ADY xəttin Gürcüstan ərazisindəki 184 km hissəsində modernləşdirmə aparıb. Layihə 13 stansiya, 55 körpü, 8 dartı yarımstansiyası, 320 bina və qurğunu əhatə edib.
30.3 km yeni dəmir yolu çəkilib, 153.1 km mövcud yol reabilitasiya olunub. İllik yükdaşıma qabiliyyəti 1 milyon tondan 5 milyon tona yüksəlib.
Modernləşdirmə BTQ-ni Orta Dəhlizin əsas arteriyalarından birinə çevirərək rəqabət qabiliyyətini artırır.
BTQ artıq sadəcə üç şəhəri birləşdirmir, həm də Avrasiya logistikasında yeni balans yaradır.
