Mənimsəmədə təqsirləndirilən Dənizkənarı Bulvar İdarəsinin sabiq sədri İlqar Mustafayev, köməkçisi Rəşad Bədəlov və "GİRASOL" MMC-nin direktoru Fuad Babayevin cinayət işi üzrə məhkəmənin növbəti iclası keçirilib.
Bakı Ağır Cinayətlər Məhkəməsində hakim tərkibi dəyişdiyi üçün istintaq yenilənib. Şahidlər ifadə veriblər.
Şahid Aydın Alxasov təqsirləndirilənləri tanıdığını deyib: "Bulvar İdarəsinə işə düzəlmişdim. Velosiped təmirçisi işləyirdim. Maaşımın 600-700 manatını kartla, 300 manatı əlbəəl alırdım."
Digər şahid Tohid Abbasov "popcorn" aparatlarını işlətdiyini bildirib. İbtidai istintaqda ifadəsi ilə məhkəmədəki ifadəsi arasında ziddiyyət yaranıb.
Şahid Tural Mirzəyev bulvarda obyektlərdən icarə haqlarını alaraq Fuad Babayevə təhvil verdiyini deyib.
Növbəti iclas iyulun 10-na təyin edilib.
İlqar Mustafayev və digərləri 12 milyon manatdan artıq vəsaiti mənimsəməkdə, vergidən yayınmaqda və pul leqallaşdırmaqda təqsirləndirilir.
