Kanada, ABŞ, Almaniya, Serbiya, Ukrayna, Qazaxıstan, Özbəkistan, Qambiya, Esvatini, Əfqanıstan, Pakistan və daha onlarla ölkə... Dünyanın dörd bir yanından insanlar Azərbaycan paytaxtında toplaşaraq bəşəriyyət üçün aktual problemlərdən olan məskunlaşmanı müzakirə etdilər.
Oxu.Az komandası olaraq mayın 17-dən start götürən Ümumdünya Şəhərsalma Forumunun 13-cü sessiyasının (WUF13) ilk dəqiqələrindən sonunadək heç bir mövzunu gözdən qaçırmamağa çalışdıq.
WUF13-də 176 ölkədən 57 mindən çox iştirakçı iştirak etdi. 400-dən çox tədbir, o cümlədən ilk dəfə keçirilən Liderlər Sammiti təşkil olundu.
Oxu.Az komandası altı gün ərzində 400-ə yaxın xəbər, özəl açıqlamalar, müsahibələr və süjetlər hazırlayaraq oxuculara çatdırdı. Müxbirlər, fotoqraflar, videoqraflar, tərcüməçilər, redaktorlar və sosial media mütəxəssisləri kəsintisiz işlədi.
WUF13 bu günə qədər ən genişmiqyaslı sessiya kimi tarixə düşdü. COP29-dan sonra ölkədə ikinci ən böyük beynəlxalq tədbir oldu. Bakı qlobal həmrəylik və tərəfdaşlıq platforması rolunu oynadı.
