Cəbrayıl rayonunda yaradılan "Ağıllı Tingçilik Mərkəzi" regionda meşə bərpasına mühüm töhfə verəcək. Layihə çərçivəsində il ərzində 2 milyon ədədə qədər ağac tinginin yetişdirilməsi planlaşdırılır.
Ekologiya və təbii sərvətlər naziri Rəşad İsmayılov "Trend"ə müsahibəsində bildirib ki, 2024-cü ilin sonundan etibarən Meşələrin İnkişafı Xidməti böyük istixanalar quraşdırmağa başlayıb. İndiyə qədər 5 böyük istixana kompleksi quraşdırılıb və hazırda bu istixanalarda illik təxminən 1 milyon ting yetişdirilir.
Mərkəz həm müasir üsullarla ting yetişdirəcək, həm də regional təlim mərkəzi kimi fəaliyyət göstərəcək. Hədəf il ərzində 2 milyon ting yetişdirərək azad edilmiş ərazilərdə meşələrin bərpasına töhfə verməkdir. Nazir başlanğıc mərhələdə olan digər alternativ layihələrin də mövcud olduğunu qeyd edib.
