WUF13 bizim üçün, xüsusən də Afrika üçün çox vacibdir. Biz burada, Azərbaycanda olmaqdan çox məmnunuq və belə bir mühüm tədbirə ev sahibliyi etdiyinə görə bu ölkəyə çox minnətdarıq.
Bu barədə Cənubi Afrikadan olan professor Mbpilo Nqubane Oxu.Az-a açıqlamasında bildirib.
Hesab edirik ki, bu forumun, xüsusən də qitəmizdə - Afrikada - son dərəcə ağır yaşayış şərtlərində yaşayan insanlar üçün əhəmiyyəti olduqca böyükdür. İnanırıq ki, bu konfrans rəsmi məskunlaşmaların formalaşdırılması və insanların layiqli mənzillə təmin edilməsi ilə bağlı bütün məsələlərin həllində irəliləyiş əldə etməyə kömək edəcək.
Professor həmçinin Azərbaycan və Cənubi Afrika arasında ikitərəfli münasibətlərin səviyyəsini yüksək qiymətləndirib.
Deməliyəm ki, ölkələrimiz arasında münasibətlərin səviyyəsi çox yaxşıdır. Bizi burada - Azərbaycanda çox isti qarşıladılar və bir çox əlaqələr qurduq. Hesab edirəm ki, Azərbaycan bu cür tədbirlərə ev sahibliyi etmək üçün yaxşı bir ölkədir və bu, gələcəkdə, xüsusən də ölkə əhalisinə müsbət təsir göstərəcək.
Mbpilo Nqubane eyni zamanda hazırda ən perspektivli tikinti texnologiyalarından da danışıb.
Ölkəmizdə biz blokçeyni tətbiq etmişik. Blokçeyn mənzil tikintisində yeni texnologiyaların bir hissəsi kimi çox vacibdir, çünki o, qısa müddətdə çox sayda evlərin tikintisinə imkan verir. Biz ölkələri oxşar texnologiyaların tətbiqinə çağırırıq, çünki bu, qeyri-rəsmi məskunlaşmalar və insanların pis yaşayış şərtləri kimi problemləri həll etməyə kömək edəcək.
Təhlükəsiz şəhər gələcəyinin təmin edilməsində bir çox çağırışlar var, amma mənim fikrimcə, ən böyük problem evsizlikdir və biz bunu birlikdə həll etməliyik.
