Bakıda keçirilən COP29, paytaxtda yeni velosiped marşrutlarının və xüsusi avtobus zolaqlarının yaradılmasına, həmçinin Xaqani bağı və 28 May ərazisinin yenidən qurulmasına təkan verib.
Oxu.Az xəbər verir ki, bunu BMT-nin Məskunlaşma Proqramının (UN-Habitat) Azərbaycandakı Ofisinin rəhbəri Anna Soave WUF13 çərçivəsində keçirilən konfransda deyib.
O bildirib ki, bu layihələr Bakıda insanmərkəzli şəhərsalma yanaşmasının mümkün olduğunu göstərir və yeni urbanistik istiqamətin göstəricisidir.
Anna Soavenin sözlərinə görə, WUF13 bu prosesi daha da gücləndirə bilər. Bunun üçün forumun yaratdığı enerjinin uzunmüddətli öhdəliklərə çevrilməsi vacibdir.
O əlavə edib ki, mənzil siyasəti, mobillik, iqlimə uyğunlaşma, tullantıların idarəolunması və ictimai məkanların təşkili vahid sistem kimi idarə edilməlidir.
UN-Habitat rəsmisi vurğulayıb ki, şəhərsalma təkcə infrastruktur məsələsi deyil, eyni zamanda, ictimai sağlamlıq və sosial rifahla birbaşa bağlıdır.
