Səhiyyə Nazirliyi xaricə səfər planlaşdıran azərbaycanlılara Ebola ilə bağlı xəbərdarlıq edib. Nazirlik bildirib ki, Ebola Azərbaycan üçün endemik deyil və hazırda ölkədə yayılma riski aşağıdır.
Xüsusi Təhlükəli İnfeksiyalara Nəzarət Mərkəzindən verilən məlumata görə, xəstəlik əsasən Afrika qitəsinin müəyyən regionlarında qeydə alınır və lokal xarakter daşıyır. Beynəlxalq məlumatlara əsasən, epidemiyanın digər regionlara geniş miqyasda yayılma ehtimalı məhduddur.
Virus heyvanlar və yoluxmuş şəxsin qanı və digər bioloji mayeləri ilə sıx təmas zamanı ötürülür, gündəlik sosial təmas yolu ilə yayılmır. Bu səbəbdən əhali üçün real epidemioloji təhlükə aşağı qiymətləndirilir.
Ölkəmizdə epidemioloji nəzarət tədbirləri davamlı həyata keçirilir. Riskli ölkələrdən gələn və ya şübhəli şəxslərlə təmasda olanlar tibbi müşahidəyə alınır. Laborator müayinələr üçün lazımi bazalar mövcuddur.
Hazırda əlavə məhdudiyyət tələb olunmur. Vətəndaşlara beynəlxalq səfərlər zamanı gigiyena qaydalarına riayət etmək və rəsmi mənbələrin məlumatlarını izləmək tövsiyə olunur.
