Böyük zəhmətlə pul yığıb və ya kredit götürüb yeni tikilidən mənzil alırsınız. Lakin illər keçsə də, çıxarış ala bilmirsiniz. Öz evinizdə hüquqi baxımdan qonaq kimi yaşayırsınız.
Baku TV xəbər verir ki, məsələ Nəsimi rayonu, 4-cü mikrorayon, Mir Cəlal küçəsi, 34 ünvanındakı "Atlas" MTK-nın binası ilə bağlıdır.
Sakinlər deyir ki, bina 6 ildən çoxdur istismar olunsa da, çıxarış verilmir. Alarkən qısa müddət vəd edilib, amma problem həll olunmayıb.
İddiaya görə, binanın layihəsi 16 mərtəbə üçün təsdiqlənib, amma sonradan əlavə iki mərtəbə tikilib. Buna görə bina istismara qəbul olunmur.
Fövqəladə Hallar Nazirliyi bildirib ki, tikinti "Atlas Plaza" MMC-yə verilən icazə əsasında aparılıb. Lakin şirkət layihədən kənara çıxaraq əlavə mərtəbələr inşa etdiyindən istismara hazırlıq aktı rəsmiləşdirilməyib.
Qurum qeyd edib ki, binanın mövcud vəziyyəti dövlət qurumları ilə razılaşdırılmalı, əlavə tikintiyə icazə alınmalıdır. Sonra istismara qəbul məsələsinə baxıla bilər.
