Esvatini Kralı III Msvati Bakını zəngin tarixi irsi, innovasiya və tərəqqini uğurla birləşdirən unikal şəhər adlandırıb.
Oxu.Az xəbər verir ki, bu fikirlər Ümumdünya Şəhərsalma Forumunun 13-cü Sessiyası çərçivəsində keçirilən Liderlər Sammitində səsləndirilib.
Kral qonaqpərvərliyə və yüksəksəviyyəli təşkilatçılığa görə təşəkkür edib. O vurğulayıb ki, mənzil beton və poladdan ibarət deyil, insan ləyaqəti, təhlükəsizlik, sabitlik və ümid deməkdir.
Kral ölkəsinin təcrübəsindən də danışıb: "Esvatini hökuməti əlçatan mənzil, keyfiyyətli infrastruktur və ekoloji dayanıqlılıq istiqamətində geniş proqramlar həyata keçirir. 2025-ci ildə istifadəyə verilmiş 'Strategiya 2030' Yeni Şəhər Gündəliyi və Dayanıqlı İnkişaf Məqsədlərinə uyğundur".
