Azərbaycanda həkim çatışmazlığı aktuallığını qoruyur. Rəsmi məlumatlara görə, ölkədə 34 776 həkim var, onların 68%-i Bakıda çalışır. Paytaxtda hər 10 000 nəfərə 100 həkim düşsə də, bölgələrdə bu rəqəm kəskin aşağıdır.
Daşkəsən rayonunda cəmi 15 həkim var, hər 10 000 nəfərə 4 həkim düşür. Tovuzun Köhnəqala kəndində sakinlər həkim tapmaqda çətinlik çəkdiklərini deyirlər: “Kəndimizdə həkim yoxdur, Şəmkirə, Gəncəyə getməli oluruq. Ürək, ağciyər həkimi, nevropatoloq tapmaq mümkün deyil”.
Oğuz rayonunda da vəziyyət oxşardır. Cəmi 57 həkim qeydə alınıb, travmatoloq və endokrinoloq tapmaq çətindir. Vətəndaşlar böyrək və şəkər xəstəlikləri üçün Şəkiyə getməyə məcbur olduqlarını bildirirlər.
Milli Məclisin Səhiyyə Komitəsinin üzvü Müşfiq Məmmədli hesab edir ki, problemi həll etmək üçün həkimlərin bölgələrdə işləməyə marağını artıran tədbirlər görülməlidir. Mənzillə təminat, maddi stimullaşdırma, özəl sektorun təşviqi və ipoteka güzəştləri təklif edilir.
TƏBİB-dən bildirilib ki, bölgələrdə müəyyən profillər üzrə həkim çatışmazlığı var və bu istiqamətdə kadr planlaması təkmilləşdirilir.
