Yollarda sakinlər tərəfindən quraşdırılan sürətazaldıcı maneələrə tez-tez rast gəlinir. Baku TV-nin məlumatına görə, bəzi ərazilərdə hər qapının qarşısında belə maneələr var.
Sakinlər deyir ki, məqsəd uşaqların və piyadaların təhlükəsizliyini təmin etməkdir: "Maşınlar sürətlə keçməsin deyə qoyublar. Uşaqlar anidən yola çıxa bilər".
Sürücülər isə maneələrin standartlardan kənar olduğunu və nəqliyyat vasitələrinə zərər verdiyini bildirirlər: "Hər qapının ağzında bir tramplin var".
Nəqliyyat eksperti Eldəniz Cəfərov bildirib ki, ümumi yollarda maneələr yalnız dövlət qurumlarının razılığı ilə quraşdırıla bilər. Çoxmənzilli binaların həyətlərində isə Mənzil Məcəlləsi sakinlərə icazə verir.
Baş Dövlət Yol Polisi İdarəsinin bölmə rəisi Toğrul Nəsirli qeyd edib ki, "Yol hərəkəti haqqında" qanuna əsasən, yollarda maneə yaratmaq qadağandır. İcazəsiz tramplin quraşdıran fiziki şəxslər 80-100 manat, vəzifəli şəxslər 400-500 manat, hüquqi şəxslər isə 3000-4000 manat cərimələnə bilər.
