Son günlər Azərbaycanda və dünyada güclü yağıntılar müşahidə olunur. Bəzi mənbələr yağışların süni şəkildə idarə olunduğunu iddia edir.
Xarici mediaya görə, İran və ABŞ-İsrail müharibəsindən sonra iqlimdə dəyişikliklər baş verib. İddiaya əsasən, İslam Respublikası İsrailin iqlim mərkəzlərini sıradan çıxarıb və nəticədə yağıntılar artıb.
Ekspertlər ABŞ-Vyetnam müharibəsindəki "Operation Popeye" əməliyyatını xatırladır. O zaman "cloud seeding" texnologiyası ilə buludlara gümüş yodid səpərək musson yağışları uzadılıb.
İndi də oxşar texnologiyalarla müəyyən ərazilərə yağış yağmasının qarşısı alındığı iddia olunur. Bəs bu iddialar nə dərəcədə doğrudur?
Ekoloq Sadiq Həsənov Oxu.Az-a açıqlamasında süni yağış texnologiyasının illərdir mövcud olduğunu bildirib. Lakin yağışların qarşısını almağın ağlabatan olmadığını vurğulayıb:
"Süni yağış 30 ildən çoxdur aktualdır. Səudiyyə Ərəbistanı səhraları yaşıllaşdırmaq üçün milyardlarla dollar xərcləyib. Lakin buludları idarə edib qarşısını almaq mümkün deyil. Bu texnologiya hazırlanmayıb. Yağışlar iqlim dəyişikliyi ilə bağlıdır. 2025-ci ildə daşqınların sayı 15-dən 80-ə artıb, temperatur 1.5-2 dərəcə yüksəlib."
