Uzun illərdir sürücülər icbari sığorta ilə yanaşı, avtomobillərinə kasko sığorta da etdirə bilirlər. Baku TV-nin məlumatına görə, ilk vaxtlar maraq az olsa da, son dövrlərdə müraciətlər ciddi artıb.
Sığorta üzrə ekspert Emil Ağabağırov bildirib ki, kasko sığortası təbii fəlakətlər, güclü külək və digər hadisələrdən avtomobili qoruyur: “Sürücülərə tövsiyə edirik ki, bu sığorta növündən istifadə etsinlər. Çünki bu hadisələr avtomobilə ciddi ziyan vurur və kasko həm nəqliyyat vasitəsini, həm də ailə büdcəsini qoruyur.”
Nəqliyyat eksperti Eldəniz Cəfərov qeyd edib ki, son təbii hadisələrdən sonra kaskoya maraq daha da artıb. Sığorta şirkətləri müştəri cəlb etmək üçün kampaniyalar və hissəli ödəniş imkanları təqdim edir.
O, bildirib ki, icbari sığortadan fərqli olaraq, kasko öz əmlaka dəyən zərəri qarşılayır. Kasko almaq istəyənlər əvvəlcə agentlərə müraciət edib müqavilənin şərtlərini dəqiqləşdirməlidir. Azadolma məbləği və avtomobilin bazar dəyərinin müəyyən edilməsi gələcək problemlərin qarşısını alır.
