Sumqayıt Şəhər Ağsaqqallar Şurasına yeni sədr seçilib.
Oxu.Az Ölkə.az-a istinadən xəbər verir ki, bu vəzifəyə Eldar İsmayılov gətirilib.
İyunun 22-də Sumqayıt Şəhər Ağsaqqallar Şurasının seçki konfransı keçirilib. Tədbirdə Azərbaycan Ağsaqqallar Şurasının sədr müavini, Milli Məclisin deputatı, professor Eldar İbrahimov, Sumqayıt Şəhər İcra Hakimiyyətinin başçısı Zakir Fərəcov, Azərbaycan Ağsaqqallar Şurasının aparat rəhbəri Ramin Həsənli və mətbuat katibi Rafiq Rzayev, eləcə də şəhərin ağsaqqalları, ziyalıları və ictimaiyyət nümayəndələri iştirak ediblər.
Eldar Vəkil oğlu İsmayılov 1949-cu il yanvarın 25-də Qazax rayonunun Qaymaqlı kəndində anadan olub. 1990-cı ildə Ali Sovetin deputatı seçilib. 1991-1992-ci illərdə Sumqayıt Şəhər İcra Hakimiyyətinin başçısı olub. 1999-2014-cü illərdə Sumqayıt Bələdiyyəsinin üzvü kimi fəaliyyət göstərib. 2014-cü ildən Məcburi Köçkünlərin Sosial İnkişaf Fondunda işlər idarəsinin müdiri-aparat rəhbəri vəzifəsində çalışıb.
Prezident İlham Əliyevin 2009-cu il 16 noyabr sərəncamı ilə "Şöhrət" ordeni ilə təltif edilib.
Qeyd edək ki, əvvəlki sədr Təbrik Quliyev bir neçə gün əvvəl istefa verib.
Fotoda Eldar İsmayılov.
