"Böyük Qayıdış" proqramı çərçivəsində doğma yurdlarına qayıdan əhalinin mənzil hüquqlarının tənzimlənməsi üçün qanunvericilikdə dəyişikliklər gözlənilir.
Vətəndaşların Əmək Hüquqlarını Müdafiə Liqasının sədri Sahib Məmmədov bildirib ki, mövcud qanunlara əlavələr edilməsi, zərurət yarandıqda isə yeni qanunlar qəbul edilməlidir.
Milli Məclisə Mənzil Məcəlləsi və "Qaçqınların və məcburi köçkünlərin statusu haqqında" Qanuna geniş dəyişikliklər təklif olunur. Əsas məqsəd məskunlaşan əhalinin mənzil mülkiyyət hüquqlarını tənzimləməkdir.
Mənzillərin verilmə qaydası, statusu və mülkiyyət hüququnun tanınması dəyişikliklərin əsas istiqamətləridir. Məcburi köçkün statusu tədricən ləğv edilərkən sosial dəstək mexanizmləri də qanunvericilikdə öz əksini tapmalıdır.
Qayıdan əhalinin sosial inteqrasiyası, səhiyyə, təhsil və məşğulluq məsələləri də diqqət mərkəzindədir. Kənd təsərrüfatı ilə məşğul olmaq istəyənlər üçün torpaq münasibətlərinin tənzimlənməsi vacibdir.
