Azərbaycanda bəzi xəstəliklərin müalicəsi məcburidir. Əks halda, cərimə və hətta həbs cəzası tətbiq oluna bilər.
İnzibati Xətalar Məcəlləsinə əsasən, zöhrəvi xəstəliklərə yoluxduğunu bilən şəxs tibb müəssisəsinin xəbərdarlığına baxmayaraq müalicədən boyun qaçırarsa, 100-150 manat cərimələnir.
Həmçinin, zöhrəvi xəstəliyi olan şəxslə təmasda olmuş və müayinəyə ehtiyacı olan şəxs xəbərdarlıqdan sonra müayinədən yayınarsa, 80-120 manat cərimə olunur.
Zöhrəvi xəstəliyi olan şəxsin yoluxma mənbəyini gizlətməsi 100-200 manat cərimə ilə nəticələnir.
Cinayət Məcəlləsinə görə, zöhrəvi xəstəliyini bilə-bilə başqa şəxsə yoluxdurma 2500-5000 manat cərimə, 2 ilədək islah işi və ya 2 ilədək azadlıqdan məhrumetmə ilə cəzalandırılır. Eyni əməl iki və ya daha çox şəxsə, yaxud yetkinlik yaşına çatmayan şəxsə qarşı törədildikdə, 4 ilədək həbs cəzası nəzərdə tutulur.
