17 iyun tarixində Medianın İnkişafı Agentliyində (MEDİA) İslam Əməkdaşlıq Təşkilatının (İƏT) Xəbər Agentlikləri Birliyinin baş direktoru ilə ikitərəfli görüş keçirilib.
Görüşdə MEDİA-nın icraçı direktoru Əhməd İsmayılov qlobal informasiya məkanında sürətlə dəyişən çağırışlar fonunda media qurumları arasında əməkdaşlığın gücləndirilməsinin vacibliyini vurğulayıb. O, saxta məlumatlara qarşı mübarizədə təcrübə mübadiləsi, media savadlılığının təşviqi və dezinformasiyaya qarşı koordinasiyalı fəaliyyətin genişləndirilməsinin önəmini qeyd edib.
İƏT Xəbər Agentlikləri Birliyinin baş direktoru Məhəmməd Əl-Yami isə rəqəmsal transformasiya dövründə süni intellekt kimi innovativ texnologiyaların media sahəsində məsuliyyətli və şəffaf istifadəsinə diqqət çəkib. O, kontentin hazırlanması, yoxlanılması və idarə olunmasında yeni texnologiyaların peşəkar jurnalistika prinsiplərinə uyğun tətbiq edilməli olduğunu bildirib.
Görüş zamanı media savadlılığının artırılması, informasiya təhlükəsizliyinin təşviqi, innovativ həllərin tətbiqi və gələcək əməkdaşlıq perspektivləri müzakirə edilib.
