İşğaldan azad olunmuş rayonların bərpası və əhalinin qayıdışı səbəbindən Bakıdakı bəzi köçkün məktəbləri bağlanır. Bu, həmin məktəblərdə çalışan işçilərin narazılığına yol açıb.
Oxu.Az-ın qaynar xəttinə daxil olan şikayətdə bildirilir ki, Qarabağ Regional Təhsil İdarəsi yeni məktəblər yaratsa da, bütün işçilər işlə təmin olunmayıb. Müəllimlərin çoxu başqa məktəblərə göndərilsə də, direktorlar, müavinlər, UBR rəhbərləri, kitabxanaçılar, laborantlar və texniki işçilərin əksəriyyəti işsiz qalıb.
Mehdiabad qəsəbəsində Ağdam rayon 34 nömrəli, Füzuli rayon 3 nömrəli və Kəlbəcər rayon 13 nömrəli tam orta məktəblər bağlanıb. Onların yerində Mehdiabad qəsəbə 7 nömrəli tam orta məktəb yaradılır. Şagirdlər yeni məktəbə yönləndirilir.
İddialara görə, 30-a yaxın işçi işsiz qalıb. Onların əmək müqavilələrinə xitam verilib.
Abşeron-Xızı Regional Təhsil İdarəsindən bildirilib ki, optimallaşdırma prosesi davam edir. Hələ yekun qərar qəbul edilməyib. Qərardan sonra işçilərin təminatı dəyərləndiriləcək.
